Serie tomando como “soporte” famosos refráns e expresións típicas de Galicia
• Capítulo I: Nunca choveu que non escampara
• Capítulo II: Outra vaca no millo
Dependendo da zona de Galicia, dise tamén “Outra vaca no maínzo”.
É unha expresión típica de Galicia, que contén moita información. Pódese usar en distintos contextos en con distintos significados:
• Para indicar que unha persoa actúa igual de mal que outra (como dicir en español “otro que tal baila”)
• Para expresar que un feito ou unha acción determinada é igual de inconveniente que outra anterior (como dicir en castelán: “éramos pocos y parió la abuela”; o que significa que se xa non tivéramos cousas malas ata o momento, chega outra máis).
Tradución literal ao español: “Otra vaca en el maíz” (que non se usa ).
Existe unha expresión moi semellante en castelán: “Otra vez la burra al trigo”.
Pero a galega ten moita mais retranca...
Que “acomodo” ten esta expresión na contorna da igualdade de xénero?
Pois naquelas situación nas que se seguen a perpetuar os estereotipos de xénero, no canto de fomentar a igualdade entre menos e nenas ou homes e mulleres:
Como exemplos, e para que se entenda perfectamente:
A. Expresións habituais (aínda a día de hoxe ), que indican claramente que tanto os roles como os estereotipos de xénero afectan a nenos e a nenas:
|
Referidos a elas |
Referidos a eles |
|
Falas como un marimacho |
Ten un estilo efeminado |
|
Non leves esa saia tan corta, que vas provocando… |
Un home non chora, pareces unha nena |
|
A muller non ten autoridade para ocupar postos de dirección |
Os homes “modernos” colaboran nas labores do fogar |
B. Cultura, formas de pensar coas que se transmite aos/ás nenos/as determinados estereotipos, de modo que, cando chegan á adolescencia, xa teñen conductas adquiridas:
- A cada xénero presupónselle un determinado comportamento. A sociedade espera unha forma de ser, unha aparencia ou vestimenta definida segundo o xénero. Quen non se “axusta” ao esperado pode sufrir presións ou castigos para axustarse ao comportamento que é considerado o apropiado para o seu xénero.
- A sociedade segue asociando roles a nenos e nenas: elas son “vulnerables” e deben ser protexidas, mentres que eles son fortes e independentes…
- Hai condutas que non son válidas para unha nena. Por este motivo, a elas restrínxellas saír de casa e, se chegan tarde, os seus proxenitores molestaranse, pero é algo que non está mal visto se es un neno.
- O deporte non queda fora dos puntos anteriores: tanto a eles como a elas incítaselles a practicar xogos diferentes. Neste caso, o colectivo docente ten moito que aportar velando pola igualdade de condicións na práctica de calquera deporte, xa sexa nivel curricular ou en actividades de tempo libre ou extraescolares.
Atendendo a todo o anterior, temos claro:
1. É na educación onde podemos actuar de raíz para eliminar a desigualdade entre homes e mulleres.
2. Que se as persoas que, xa dende moi noviñas, crecen cunha serie de restricións sociais determinadas polo seu xénero, na súa etapa adulta serán homes e mulleres que terán interiorizado ideas como que as mulleres son débiles e os homes son poderosos.
3. É importante que todos (homes e mulleres) sexamos conscientes de situación como as que describimos anteriormente, e que aínda queda camiño por percorrer para acadar a igualdade.
Como cada persoa, co seu exemplo e actitude, decide que tipo de valores quere defender e inculcar, que se traducirá en que tipo de sociedade quere vivir, está nas nosas mans deixar claro o rexeitamento ao sinalado nos apartados A e B.
E, unha forma facelo, é responder a esas actitudes, formas de pensar e expresións coa frase do capítulo de hoxe:
“Outra vaca no millo”!
Seguro que o entenden.
Se precisas apoio ou apoio técnico, podes contactar co no noso Gabinete de Igualdade:
[email protected]
981 555 888
