A igualdade salarial entre mulleres e homes é fundamental para alcanzar os obxectivos da Axenda 2030 para o Desenvolvemento Sostible (ODS), en concreto o obxectivo 5: “Lograr a igualdade entre os xéneros e apoderar a todas as mulleres e as nenas”, e, especificamente, dúas das metas deste obxectivo 5:
- Asegurar a participación plena e efectiva das mulleres e a igualdade de oportunidades de liderado a todos os niveis decisorios na vida política, económica e pública.
- Aprobar e fortalecer políticas acertadas e leis aplicables para promover a igualdade de xénero e o apoderamento de todas as mulleres e as nenas, a todos os niveis.
Que se entende por igualdade salarial entre mulleres e homes?
Igual remuneración polo desempeño dun traballo de igual valor.
Considérase o principio para lograr a equidade salarial entre elas e eles.
Dende cando se conmemora esta data? Dende 2020.
O 26 de novembro de 2019 a Asemblea Xeral da ONU decidiu aprobar a resolución A/RES/74/3999 do Consello de Dereitos Humanos proposta por 29 países (entre eles España) para que se conmemorase o Día Internacional da Igualdade Salarial.
Nesta resolución ínstase aos estados para que implanten políticas e leven a cabo accións para garantir a igualdade na remuneración. Todo iso, en colaboración con Nacións Unidas, o sector privado, sindicatos, organizacións empresariais e sociedade civil.
Resumindo: A igualdade salarial (equidade remunerativa) é un obxectivo necesario para lograr a realización dos dereitos humanos e a igualdade de xénero, requirindo o esforzo de todos e todas para acadala.
Que representa este día?
Os constantes esforzos por conseguir a igualdade salarial por un traballo de igual valor, e a loita polos dereitos humanos e contra todas as formas de discriminación, incluída a discriminación contra as mulleres e as nenas.
Cales son os obxectivos?
- Lograr o emprego pleno e produtivo.
- Garantir un traballo decente para todos os homes e mulleres, incluídos os mozos e as persoas con discapacidade.
- A igualdade de remuneración por traballo de igual valor que figura nos Obxectivos de Desenvolvemento Sostible, en particular no obxectivo 8, meta 5.
Motivos para conmemorar esta data:
- Segundo datos de Nacións Unidas, a brecha salarial de xénero a nivel mundial estímase nun 23%.
- O dato anterior frea de forma importante o avance do apoderamento e a igualdade das mulleres (como xa dixemos, parte dos ODS incluídos na Axenda 2023 por Nacións Unidas).
Parte da fenda salarial está relacionada coa discriminación por razón de sexo, a conciliación (o colectivo feminino é maioría nos contratos a tempo parcial para poder compatibilizar os coidados de persoas co emprego remunerado), as paredes de cristal (menor presenza de mulleres en determinados sectores, concentrándose en sectores peor remunerados) e o famoso teito de cristal (menor presenza de mulleres en postos de dirección).
Para rematar, unhas significativas declaracións do secretario xeral de Nacións Unidas, António Manuel de Oliveira Guterres (2020):
“Debemos preguntarnos por que as mulleres son relegadas a traballos peor remunerados; por que as profesións en que predominan as mulleres, incluídos os traballos no sector da asistencia, teñen salarios máis baixos; por que tantas mulleres traballan a tempo parcial; por que as mulleres ven diminuír os seus salarios coa maternidade, mentres que os homes con fillos a miúdo gozan dun aumento salarial; e por que as mulleres se encontran cun tope infranqueable nas profesións con maiores ingresos”.
Feliz Día da Igualdade Salarial!
