ROADSHOW BID4TENDERS - OURENSE

Na Confederación de Empresarios de Galicia iniciamos un ciclo de presentacións do proxecto BID4Tenders, desenvolto en colaboración con AEP, CEVAL, IAPMEI e IGAPE, cuxo obxectivo é apoiar ás pemes para aproveitar ao máximo as oportunidades de negocio que lles ofrece a contratación pública.

O actual panorama na contratación pública española vén caracterizado por un crecemento do 57% no valor dos contratos públicos no últimos cinco anos, alcanzando máis de 28.000 millóns de euros, o que contrasta coa diminución na participación de empresas en licitacións de catro ofertas por contrato en 2021 a tres en 2023, e o aumento de licitacións desertas ao 9%. Esta situación revela a necesidade de superar obstáculos, eliminar mitos e aproveitar un nicho de mercado accesible ás pemes.

As accións da CEG no marco do proxecto estarán dirixidas a identificar os desafíos aos que se enfrontan as empresas, implementar programas de apoio e capacitación deseñados para simplificar o acceso á información, mellorar a comprensión dos procesos de licitación e aumentar as oportunidades de éxito no ámbito da contratación pública. Para iso contaremos coa colaboración da Confederación Empresarial de Ourense, que acollerá na súa sede o primeiro Roadshow o próximo 29 de maio.