A Confederación de Empresarios de Galicia (CEG) congregou esta mañá en Santiago de Compostela aos representantes das empresas do seu Consello Asesor para abordar a temática do financiamento das empresas e especialmente o papel do Instituto de Crédito Oficial ( ICO) impulsando a recuperación e transformación da economía española, nun encontro que contou coa intervención co presidente da entidade pública empresarial, José Carlos García de Quevedo, como protagonista.
Juan Manuel Vieites, presidente da organización empresarial galega, foi o encargado de abrir esta reunión na que participaron tamén representantes das empresas Ence, Nova Pescanova, Accenture, O Corte Inglés, FEUGA, Jealsa Rianxeira, R, Santander, Abanca, Banco SabadellGallego, GDoce, Froiz, Luckia, Pérez Rumbao, Leite Río e Civis Global; así como tamén o presidente da Confederación de Empresarios da Coruña (CEC), Antonio Fontenla; representantes das patronais sectoriais como os presidentes de CEGASAL, FGC, FEGACONS e FEGAXE-AJE Galicia, José Antonio Vázquez Freire, José María Seijas López, Diego Vázquez Reino e Luciano Covelo, respectivamente; e os secretarios xerais de ACIGA, FEGAPE e FEGATRAMER; Rogelio Villar, David Sobral e José García Cumprido, respectivamente.
Durante a súa intervención destacou a importancia do “financiamento” para as empresas como “panca crave para o seu funcionamento” sendo fundamental que o acceso á mesma sexa “áxil, flexible e segura”.
Na súa referencia aos “fondos europeos”, o presidente da organización empresarial galega solicitou ao Executivo que considere a posibilidade de incrementar ao 50% o financiamento dos proxectos que as pemes presentan para ser subvencionados cos mesmos porque “na actualidade o financiamento destes recursos é do 30% para as pequenas e medianas empresas, o que debido ás complicacións de liquidez que houbo coa pandemia está a derivar en que as axudas non estean a chegar ás mesmas de forma efectiva”.
Finalmente Vieites solicitou o “apoio do sector bancario” para solucionar o pescozo de botella que se está producindo desde o punto de vista da xestión na repartición de fondos, “como elemento vertebrador das axudas polo seu coñecemento da situación concreta do tecido empresarial en cada territorio”.
“Sen dúbida -en palabras do presidente da CEG- a colaboración público-privada entre Administración, sector financeiro e compañías eríxese en peza fundamental na modernización e transformación do modelo produtivo español en xeral e galego en particular”.
A continuación tomou a palabra o conselleiro de Facenda e Administración Pública da Xunta de Galicia, Miguel Corgos, quen reiterou o compromiso do Goberno galego coas pemes, autónomos e o tecido industrial de Galicia, avanzando que os orzamentos do ano próximo ano van reforzar os apoios para facilitar a implantación de novos proxectos na comunidade galega.
José Carlos García de Quevedo, pechou o encontro –que deu paso a un coloquio cos demais asistentes- no que explicou a actividade que leva a cabo o ICO na súa tripla función -como banco nacional de promoción, instrumento financeiro de política económica e axente financeiro do Estado- para impulsar o crecemento sostible das empresas e potenciar a súa transformación dixital poñendo ao dispor do tecido empresarial opcións de financiamento adaptadas ás necesidades de empresas de todos os tamaños e sectores.
Actualmente, a actividade crediticia xestionada polo ICO en Galicia representa un importe superior a 11.000 millóns de euros distribuídos en máis de 80.000 operacións de financiamento.
Neste volume, segundo indicou o presidente do ICO, cobra especial relevancia a utilización das Liñas de avais, por parte dos autónomos, pemes e empresas galegas que subscribiron 70.000 operacións, mobilizando 6.500 millóns de euros en financiamento. Estas liñas contribuíron a mitigar o impacto económico xerado pola crise sanitaria, protexendo a actividade das empresas e o emprego, motor da recuperación.
García de Quevedo -que foi presentado polo conselleiro delegado de Abanca, Francisco Botas-, tamén destacou o impacto positivo do Plan de Recuperación, Transformación e Resiliencia na comunidade. Neste sentido indicou que Galicia xa ten despregados máis de 1.400 millóns de euros no marco deste plan, dos que 818 están a ser xestionados pola Xunta.
Ademais incidiu na importancia da colaboración público privada, como mostra a participación de empresas e entidades galegas en seis proxectos estratéxicos ( PERTE) postos en marcha polo Goberno, para potenciar o crecemento da rexión e a xeración de emprego de calidade.
