Juan Manuel Vieites oficializou hoxe en Lugo ante os medios de comunicación, cunha rolda de prensa na sede da Confederación de Empresarios de Lugo (CEL), a súa candidatura á presidencia da Confederación de Empresarios de Galicia (CEG) acompañado do conselleiro delegado da CEL, Eduardo Valín, e o presidente da organización empresarial coruñesa e nestes momentos portavoz da CEG, Antonio Fontenla.
Trátase da única candidatura presentada ao actual proceso electoral no que está inmersa a CEG, e que culminará o día 21 de xaneiro, data para a que está convocada a Asemblea Electoral na que previsiblemente se proclamará a Juan Manuel Vieites como novo presidente da organización empresarial galega.
A candidatura de Juan Manuel Vieites nace do consenso, tal e como destacou Eduardo Valín na súa intervención, subliñando que “é hoxe a persoa ideal” para lograr esa obxectivo clave para a CEG que é “a necesaria unidade que fai forte e válida a unha entidade asociativa”. Valín significou tamén que “a súa traxectoria profesional e coñecemento das organizacións empresariais faille idóneo para reforzar a representatividade dos empresarios que a CEG ten ante a Administración, os axentes sociais e a sociedade en xeral”.
O conselleiro delegado da CEL agradeceu a Vieites que “aceptase o reto” de poñerse á fronte da CEG e manifestou a súa confianza en que logre o que sempre quixeron os empresarios de Lugo para esta entidade: “que sexa unha asociación empresarial forte, representativa e útil para os nosos obxectivos empresariais e económicos”.
Pola súa banda, Antonio Fontenla subliñou tamén o seu agradecemento a Juan Vieites por presentarse, e a satisfacción de que se confirmou “ como candidato único” unha persoa á que coñece ben e que “formou parte do meu Comité Executivo como vogal de libre designación”. Resaltou tamén o papel da CEL, á que cualificou como “asociación amiga”, na materialización desta candidatura e que Vieites contará “coa colaboración de todos porque nestes momentos é moi necesario ese apoio” e o seu convencemento de que “o fará moi ben”.
Unidade empresarial de acción
Pola súa banda, Juan Manuel Vieites subliñou que se presenta “con ánimo e ilusión, por compromiso empresarial e porque é a hora da unidade empresarial de acción”, e que se traballará “por parte de todos” e conformando “un equipo profesional na CEG adecuado para defender ás empresas de Galicia”.
Vieites manifestou tamén na súa intervención o papel da CEG “como única voz emanada da Constitución para evitar que o mundo empresarial véxase menoscabado” e para traballar “por unha mellora económica e social de Galicia”. “A CEG é a representación empresarial galega” – recalcou- “está por encima das persoas e é moi necesaria para dinamizar ao sector empresarial galego”.
Programa
No seu programa de traballo de Vieites, ademais da tradicional defensa dos piares básicos da economía (liberdade de empresa, unidade de mercado, libre competencia), inclúe a implementación de liñas que axuden a reforzar a CEG como a institución fundamental de representatividade dos empresarios galegos e interlocución #ante a Administración que é, e así llo recoñece a Constitución. Para iso fortaleceranse as súas políticas de comunicación, o seu papel (xa fundamental) no Diálogo Social e o deseño de políticas activas de emprego ou o impulso de accións relacionadas coa dixitalización, as enerxías renovables (economía verde), a internacionalización, os proxectos Galicia – Norte de Portugal, as infraestruturas galegas ou o emprendemento na Comunidade.
A nivel interno, buscarase reforzar o Consello Asesor da CEG; acordar a reforma dos Estatutos da entidade para a súa adecuación aos tempos actuais e unha mellor gobernanza ou incrementar a presenza da muller empresaria na entidade, entre outros.
Igualmente, non se perderán de vista as problemáticas máis inmediatas derivadas da COVID-19 e o “apoio ao tecido produtivo a través do Plan de Recuperación Europeo para España”.
