Foro Galego de Seguridade e Saúde Laboral: As Novas Contornas Laborais

A Confederación de Empresarios de Galicia leva máis de tres décadas fomentando un mercado de traballo respectuoso e seguro, impulsando a mellora da prevención de riscos laborais nas empresas e no conxunto da sociedade, propiciando o intercambio de coñecementos e experiencias, mediante a aprendizaxe continua, o fomento da formación daqueles temas máis innovadores, facilitando espazos para a opinión, a reflexión e o debate, desenvolvendo estudos de formación, etc. co fin de contribuír ao desenvolvemento desta materia como elemento clave na estratexia empresarial.

Durante estas décadas asistimos a cambios sociais, empresariais e industriais de diferentes velocidades ata chegar á vertixinosa revolución dixital e ecolóxica que estamos a vivir actualmente e que acelerou, modificou e transformou a forma na que nos relacionamos, producimos e traballamos, creando unha contorna laboral totalmente nova e disruptiva. Unha contorna laboral marcada por novos sistemas como a realidade estendida (XR), a intelixencia artificial xenerativa, o metacloud, o big data, a loxística autónoma, a observabilidade aplicada, o teletraballo, etc. que nos traen grandes avances, pero tamén novos desafíos para as empresas e as persoas traballadoras e por suposto novos retos no ámbito dos riscos laborais.

Como marca a “Estratexia de Seguridade e Saúde no Traballo: Horizonte 2027” hai que xerar coñecemento técnico para a prevención dos novos riscos e así evitar futuros danos para a saúde da poboación traballadora. É o momento, por tanto, de que expertos e profesionais da seguridade e saúde no traballo e da tecnoloxía compartan nun Foro de Prevención de Riscos Laborais experiencias, coñecementos, desafíos e retos na nova contorna laboral, co obxectivo de analizar e dar resposta aos riscos emerxentes derivados desa transformación dixital, ecolóxica e social.

Convidámosche a unirte a este foro e a coñecer de primeira man os retos e oportunidades aos que nos enfrontamos ante as novas contornas do mercado laboral.

Co financiamento de: