A Confederación de Empresarios de Galicia (CEG) reuniuse con *Ángela de Miguel, quen presentou o seu programa de candidatura para presidir CEPYME. Durante a reunión, escoitou tamén, de primeira man, as principais necesidades, problemas e retos que afrontan as pemes galegas.
Na reunión participaron tanto o presidente da CEG, Juan Manuel Vieites, como os vicepresidentes da entidade, e á súa vez máximos representantes das confederacións provinciais da Coruña, Lugo, Ourense e Pontevedra, representadas en Antonio Fontenla, Jaime López, Marisol Novoa e Jorge Cebreiros, respectivamente.
Ángela de Miguel explicou que "seguimos traballando polas pemes, un proxecto de unidade para devolverlles a ilusión. Agradecemos aos empresarios galegos todo o seu apoio: teñen un tecido empresarial moi forte e hoxe quixen escoitarlles e explicarlles a CEPYME que merecen".
Pola súa banda, o presidente da CEG, Juan Manuel Vieites, insistiu na necesidade de "unha CEPYME máis forte, máis unida, nesa unidade de acción conxunta con CEOE. É necesario reforzar esa imaxe e proxectos que se desenvolven desde as pemes, necesitamos que se intensifiquen os apoios ás pequenas e microempresas, xunto cos autónomos, e defender os seus intereses".
Por iso, sinalan a Ángela de Miguel como a mellor candidata "para desenvolver os obxectivos que se están marcando, precisamente, de unidade de acción desde CEOE, porque todos somos e conformamos CEOE".
Vieites defende que "nós non somos o problema, internamente, senón que temos a un Goberno que sempre está a dar unha mala imaxe do mundo empresarial e debemos buscar, entre todos, defender os intereses das nosas empresas e procurar que CEPYME e CEOE sexan unha canalización dos problemas e inquietudes que ten o mundo empresarial, tanto a nivel de Estado, como a nivel galego. Para iso Ángela de Miguel recolleu hoxe os intereses das pemes galegas".
Desde a CEG inciden en que a unidade e o consenso son a pedra angular do éxito do sistema de organizacións empresariais. Engaden que, no contexto político e económico actual, requírese dun traballo conxunto e con determinación por unha contorna que permita ás empresas competir e desenvolverse.
