A Eurorrexión Norte de Portugal-Galicia ten dado un importante paso a fronte coa constitución da Agrupación Europea de Cooperación Territorial (AECT). Precisamente, o último pleno da Comunidade de Traballo Galicia-Norte de Portugal, na que se dou carta de nacemento a dita agrupación, apuntaba entre as súas conclusións á necesidade de garantir a protección dos traballadores e o fomento da súa mobilidade. Para cumprir con estes obxectivos, engadía, resultaba imprescindible intensificar e coordinar a comunicación no ámbito laboral entre as autoridades e os axentes implicados de Galicia o do Norte de Portugal. Esta é unha tarefa que asume o Eures Transfronteirizo Norte Portugal-Galicia.
Outra das iniciativas postas en marcha a nivel comunitario afecta a un ámbito con ampla presencia na eurorrexión: a dos traballadores desprazados. A Comisión Europea publicou unha recomendación propugnando unha maior cooperación entre as administracións nos casos nos que o desprazamento dos traballadores se realice no marco dunha prestación de servizos.
Tamén se aproxima a entrada en vigor da Directiva de Servizos, que facilitará o establecemento permanente das empresas e a libre prestación de servizos ao longo de toda a UE.
Estas son só algunhas das actuacións comunitarias que afectan ao ámbito laboral na Eurorrexión Norte de Portugal-Galicia. No interior deste boletín, proporcionase cumprida información tanto sobre estes temas como sobre outros aspectos de interese no mercado de traballo da eurorrexión.
