A Confederación de Empresarios de Galicia (CEG), a través do seu presidente Juan Manuel Vieites, participou na organización da visita de EBTS Francia a un conxunto dos pazos máis significativos de Galicia, coa intención de "promover un intercambio de coñecemento e boas prácticas empresariais, un achegamento do traballo da entidade aos propietarios dos pazos galegos e a procura de alianzas e futuras colaboracións".
EBTS France (European Buis Society France) é a primeira asociación europea de entusiastas da xardinaría. Estableceu a súa sede en 2003 no Palacio de Europa e de Congresos de Lle Touquet-Paris-Plage. "Como institución, representa un compromiso coa preservación, o entendemento cultural e o amor pola arte e a historia. Esta visita reforza os lazos entre as nosas culturas e enriquece mutuamente a nosa visión do mundo", sinalou o presidente da CEG, Juan Manuel Vieites.
O grupo, conformado por cincuenta participantes vinculados a emblemáticos establecementos de Francia e encabezado polo delegado EBTS France, Portugal e Galicia, Francisco Calheiros de Meneses, conde de Calheiros, o presidente da CEG, Juan Manuel Vieites e Rosario Andrade Detrell de Pazo de Pegullal, acompañados ademais por un grupo de xornalistas franceses, entre outros, visitará estes días o Pazo de Faramello, Pazo de Brandeso, Pazo de Mariñán, Leira de Valdeamano, Santa Cruz de Rivadulla, Pazo Vista Alegre, Pazo de Oca, Pazo de Quiñones de León, Pazo de Pegullal, Pazo Torres de Allo, Castelo de Vimianzo e o Pazo de San Lorenzo.
Durante as visitas, accederán aos pazos máis significativos de Galicia e aos seus xardíns da man dos seus propietarios e serán recibidos nalgúns deles polas autoridades municipais de cada localidade.
Vieites explica que "destacarase a importancia e o papel que xogaron os pazos desde o punto de vista arquitectónico, histórico, turístico e gastronómico na nosa comunidade e a súa influencia no desenvolvemento do Camiño de Santiago nas súas diferentes rutas de peregrinaxe", neste sentido subliña que, precisamente, o turismo en 2024, representou aproximadamente o 11% do Produto Interior Bruto (PIB) de Galicia, segundo os datos da Xunta de Galicia que engaden que rexistrou 8,2 millóns de visitantes.
Tamén detalla que "moitos pazos en Galicia foron restaurados e abertos ao público, transformándose en museos, hoteis ou espazos para eventos. Son testemuñas vivas da historia de Galicia e o seu percorrido é unha experiencia que nos mergulla na esencia e tradición desta terra. Polo tanto, ademais de ser testemuñas arquitectónicas e históricas, souberon adaptarse aos novos tempos sen perder a esencia do que os fai únicos. Moitos deles conservan a tradición que os caracteriza, mentres que outros diversificaron a súa produción, permitíndonos gozar dos froitos da súa riqueza a través da súa comercialización".
