A Confederación de Empresarios de Galicia (CEG) condena enerxicamente a invasión que Rusia está a despregar sobre Ucraína, en primeiro lugar polo impacto directo sobre a sociedade civil ucraína que xa está a pagar as consecuencias do conflito co máis valioso: a vida dos seus cidadáns.
Pero ademais das vítimas mortais e os feridos, moitos miles de persoas perderon xa as súas casas, os seus negocios e os seus empregos, víronse obrigados a separarse das súas familias e a renunciar sine die aos seus proxectos.
En definitiva, un terrible dinámica que a patronal galega espera que sexa revertida canto antes e recupere o equilibrio sobre o que construímos a Europa dos últimos 80 anos.
A organización empresarial galega móstrase tamén especialmente preocupada polas nefastas consecuencias que terá o conflito armado no escenario económico, xa que se abriu un escenario incerto. Desta forma, teme resultados no ámbito enerxético, polo que pode supoñer para a evolución dos prezos e os abastecementos, así como para o comportamento dos mercados en xeral, sempre inimigos da inestabilidade e a incerteza.
Ademais, a CEG lembra que hai que ter en conta que España e Galicia dependen de Ucraína –o celeiro de Europa- no que a determinados cereais -trigo, millo ou cebada, entre outros-, refírese. E é que un corte de subministracións supoñería outro freo na recuperación para este sector.
Igualmente, a Confederación de Empresarios de Galicia móstrase alarmada polas posibles consecuencias da guerra para a industria galega.
Así as cousas, a CEG fai un chamamento ás autoridades europeas e españolas para que sexan precisos na definición e informen da maneira máis detallada e actualizada posible sobre as sancións impostas a Rusia así como das medidas de apoio que establezan para minorar as consecuencias nas economías motivadas polo conflito armado.
A CEG considera que neste momento débese priorizar o diálogo e a diplomacia co fin de que se restaure a paz, a seguridade e a estabilidade económica en Europa o máis axiña posible.
