A Confederación de Empresarios de Galicia (CEG) reivindica a súa aposta firma pola reindustrialización e a reinvención da industria como claves de futuro no marco da celebración do webinar “Galicia 2030: Reinventar a industria”, que desenvolveu esta mañá e que contou coa intervención do vicepresidente segundo e conselleiro de Economía, Empresa e Innovación, Francisco Conde; con Sagrario Pérez, directora xeral de Calidade Ambiental, Sostibilidade e Cambio Climático; con executivos e directivos de empresas de primeiro nivel; con empresarios de vangarda de diferentes sectores e con máximos responsables de organizacións empresariais.
O presidente da CEG, Juan Manuel Vieites, lembrou, durante a súa intervención na inauguración, que “debemos encaixar nos Fondos da Unión Europea e sen demora os proxectos e investimentos que transformen o noso modelo produtivo, dimensionando a industria, apostando pola competitividade da xa existente, tendo en conta as novas condicións de mercado”.
Ademais, puntualizou Vieites, “debemos ser ambiciosos e non conformarnos con gastar e executar o que finalmente chegue a Galicia”, senón que “temos que apostar porque o investimento xere actividade económica, especialmente actividade produtiva, que achegue efecto arrastre e tractor sobre outros sectores da economía”.
Tanto o presidente Juan Manuel Vieites como Francisco Conde coinciden na importancia de contar con criterios obxectivos e igualdade de oportunidades na distribución dos Fondos do Mecanismo de Recuperación e Resiliencia para que estas axudas cumpran coa súa función; así como na importancia da colaboración público privada para, a través do Diálogo Social, configurar conxuntamente os proxectos que desde Galicia débanse promover para o seu financiamento polo mencionado plan.
O seminario en liña comezou coa temática “A industria do futuro”, na que interviñeron Luís Miguel Gilpérez, asesor e consultor estratéxico, que manifestou que “é necesario facer nestes momentos un plan de reindustrialización integral e disruptivo a teor dalgúns datos como o retroceso do PIB nun 10,8%; a taxa de desemprego; os 2,1 millóns de persoas en España en risco de pobreza; ou a elevadísima débeda pública”; e David Pozo Martínez, director de Process Automation & Dixital Enterprise en Siemens, quen apelou a que “o futuro da fabricación estará totalmente centrado no consumidor, esixindo unha personalización sen precedentes, o que derivará na necesidade dunha industria flexible, eficiente, con circularidade e con moi pouco tempo entre deseño e deseño”.
Nestas dúas últimas características coincidiu Emilio Pérez Nieto, do Grupo Pérez Rumbao, que interveu na mesa redonda “A Empresa en 2030”, xa que “para ese horizonte teremos vehículos ofertados adaptados á demanda de cada usuario e o deseño de vehículos pasará dos 5 anos actuais ás dúas anualidades”. Pola súa banda, Carmen Lence, do Grupo Lence, lembrou que “Galicia produce o 40% do leite en España pero só transformamos na nosa comunidade preto do 50%, índose unha parte importante do valor engadido fóra da nosa comunidade. Así é que pola nosa banda e para seguir sendo unha empresa relevante para Galicia, estamos a centrarnos en traballar en sustentabilidade económica, social e ambiental, en innovación e en dixitalización”. Pola súa banda, Jesús Manuel Alonso Escurís, de Jealsa, considerou que “de fronte ao futuro, imos ter que actuar con moitísima sensibilidade ao consumidor e tendo moi en conta os cambios sociolóxicos”; e finalmente Xusto Sierra Rey, de Urovesa, apelou á “necesidade de establecer unha estratexia para competir con creatividade en ser diferentes”.
Acto seguido tocoulle a quenda á temática “Industrialización en España”, coa intervención de Jordi Esteve, socio responsable de Economics en España de PwC, quen expuxo a “necesidade dunha complementariedade entre a industria 4.0 e a 5.0, poñendo o foco nas persoas, no uso da dixitalización para conseguir sustentabilidade, na formación que complemente a tecnoloxía e no control da ciberseguridad”; e coa de José Miguel Guerrero Sedano, presidente da Comisión de Industria de CEOE, que ten claro que “ter capacidade industrial propia é a mellor garantía para asegurar a autonomía produtiva, como se viu nos últimos tempos”.
“Retos e oportunidades para a empresa galega” foi o título da seguinte mesa redonda. Xosé H. Vázquez, catedrático de organización de empresas. Ecobas-UVigo, expresou a “necesidade de sistematizar a innovación, dixitalizar procesos eficientes ou alcanzar grandes acordos institucionais”; mentres que Santiago Álvarez, subdirector de proxectos tractores do IGAPE, centrou o seu discurso nos Fondos Europeos e expuxo que “ademais dos PERTE –que non serán máis de 2 ou 3 por ano-, existirán axudas seguindo as canles tradicionais nas distintas xanelas dos diversos ministerios aos que se poderán acoller as empresas dos sectores produtivos”; e Mª Sagrario Pérez, directora xeral de Calidade Ambiental, Sostenibilidade e Cambio Climático, que explicou o proceso de implantación da Axenda 2030 de Desenvolvemento Sostible na Xunta de Galicia.
Finalmente, tocoulle a quenda a “Como afrontar a reindustrialización”, panel no que Cristóbal Dobarro Gómez, presidente da Confederación de Empresarios de Ferrolterra, Eume e Ortegal, alegou ter claro que “a reindustrialización é un concepto ligado á competitividade; non é un capricho, é unha transformación estrutural que vai conducir a unha mellora competitiva”; e Víctor Nogueira García, presidente da Asociación Galega da Empresa Familiar, puxo o acento nunha prioridade como é a retención e a atracción da industria mediante o fomento da competitividade fiscal, burocrática e a oferta de chan.
