O presidente da CEG insta á construción dunha axenda empresarial compartida entre Galicia e o norte de Portugal no I Foro Atlántico Transfronteirizo

Economía Dixital Galicia, en alianza coa Confederación de Empresarios de Galicia (CEG) e co grupo editorial luso Vida Económica, celebraron, en Santiago, o I Foro Atlántico Transfronteirizo.

Durante a inauguración, o presidente da CEG, Juan Manuel Vieites, explicou que este foro chega nun momento especialmente oportuno. “Europa necesita reforzar aquilo que constitúe unha das súas grandes fortalezas: a capacidade dos seus territorios para cooperar e competir xuntos. Temos que facer que a fronteira deixe de ser un custo para converterse nunha vantaxe competitiva. A CEG leva anos traballando nesta dirección a través da cooperación cos nosos socios portugueses e, de xeito moi especial, mediante instrumentos como EURES Transfronteirizo Norte Portugal–Galicia e Enterprise Europe Network, así como mediante a nosa colaboración con organizacións empresariais portuguesas como a AEP, CEVAL, a Asociación de Empresarios de Viana do Castelo ou a ACISAT. Porque non podemos falar dunha verdadeira eurorrexión económica se aínda existen dificultades para que unha persoa poida vivir nun país e traballar no outro con normalidade”.

Neste sentido, aludiu a que “en 2025 formalizáronse en Galicia preto de 7.500 contratos con traballadores portugueses, mentres que máis de 15.000 traballadores galegos foron desprazados a Portugal durante ese mesmo ano”.

Vieites instou a que “este foro axúdenos a construír unha axenda empresarial compartida Galicia–Norte de Portugal”.

Entre os puntos salientables para abordar na devandita axenda, enumerou:

• Avanzar no Estatuto do Traballador Transfronteirizo, para facilitar a mobilidade laboral e achegar seguridade xurídica;
• Mellorar as conexións ferroviarias e loxísticas, con especial atención á conexión Vigo–Porto e ao desenvolvemento do Corredor Atlántico;
• Eliminar barreiras administrativas e fiscais que dificultan a actividade empresarial transfronteiriza;
• Impulsar a cooperación entre empresas, especialmente entre pemes, facilitando o seu acceso a mercados, financiamento, innovación e contratación pública;
• Reforzar a cooperación industrial, enerxética e tecnolóxica, aproveitando as capacidades complementarias de ambos os territorios;
• Presentar a eurorrexión conxuntamente ante Europa e ante os mercados internacionais como un territorio competitivo, aberto, industrial e conectado.

Así mesmo, lembrou que, “desde hai tempo, a CEG defende a necesidade de reducir burocracia, simplificar procedementos e aliviar as cargas que dificultan o crecemento das empresas, especialmente de pemes e autónomos. Porque unha empresa que traballa en dous países pode atoparse con dous sistemas administrativos, dous marcos fiscais, diferentes procedementos e distintas obrigacións. Por iso temos que avanzar en coordinación administrativa e simplificación. Non necesitamos necesariamente máis regulación. Necesitamos que a regulación que existe sexa máis sinxela, máis coordinada e máis doado de cumprir. Iniciativas como BID4TENDERS demostraron que existe unha ampla marxe para que as nosas pemes colaboren e accedan conxuntamente a oportunidades, tamén en materia de contratación pública”.

O I Foro Atlántico Transfronteirizo Entre os participantes estiveron Juan Manuel Vieites, presidente da CEG; Luís Ceia, vicepresidente da Asociación Empresarial de Portugal (AEP); Diego Calvo, conselleiro de Presidencia, Xustiza e Deportes Xunta de Galicia; Juan García, CEO de Grupo Economía Dixital; João Luis de Sousa/Sousa, director adxunto de Vida Economica; Paulo Vaz, editor de JANUS; Fernando González Laxe, catedrático emérito de Economia Aplicada na Universidade da Coruña (UDC); Javier Guerra, presidente da Agrupación industrial Téxtil Moda de Galicia; Lurdes Fonseca, economista e directora do Gabinete de Estudos e Estratexia de AEP; Francisco Carballo-Cruz, profesor da Universidade do Minho e membro do Foro Económico de Galicia; Luis Magalhães, Comissión Executiva KPMG Portugal.