O presidente da Confederación de Empresarios de Galicia (CEG), Juan Manuel Vieites, reuniuse esta mañá co reitor da Universidade de Vigo, Manuel Reigosa, co obxectivo, entre outros, de trasladarlle a necesidade de adecuar a oferta formativa ao mercado laboral en continua evolución, máxime nas circunstancias nas que nos atopamos por mor da pandemia derivada do COVID-19.
Neste sentido, Vieites brindoulle a maior colaboración para o desenvolvemento de proxectos conxuntos entre o ámbito empresarial e o académico non só a través da UVigo –coa representación da CEG no Consello Social da Universidade-, senón tamén da Fundación Empresa-Universidade Galega (FEUGA), entidade membro do Consello Asesor da CEG, e en cuxo Padroado se atopa a UVigo.
Ambos acordaron establecer estratexias para achegar o mundo da empresa ao alumnado universitario a través da implementación de actuacións de interese para o alumnado que desenvolvan o espírito emprendedor; a participación dos técnicos e directivos das compañías nas aulas; a consulta ás empresas acerca dos coñecementos e competencias que se van a demandar aos profesionais do futuro; e o bo plan de prácticas curriculares e extracurriculares nas empresas para todas as titulacións universitarias que complementen a formación académica do alumnado, empoderando a figura do “titor de empresa”.
