A CEG pide ao comisionado coñecer o documento do plan do Corredor Atlántico e constituír a comisión de seguimento do mesmo

A Confederación de Empresarios de Galicia (CEG) celebra unha reunión empresarial co comisionado para o desenvolvemento do Corredor Atlántico, José Antonio Sebastián. Un encontro que cualificaron como “unha oportunidade para seguir consolidando unha visión común entre administracións, empresas e sociedade civil, unha visión que sitúe a Galicia no centro das redes europeas de transporte, loxística e competitividade”.

O presidente da CEG, Juan Manuel Vieites, confirma que esta visita “representa un respaldo claro ao compromiso compartido co desenvolvemento pleno do Corredor Atlántico como infraestrutura estratéxica para a vertebración do noroeste peninsular e, moi especialmente, para o futuro de Galicia”. Na cita estiveron presentes, ademais, o delegado do Goberno en Galicia, Pedro Branco; a subdelegada María Rivas; e o director xeneral comercial de Abanca, Gabriel González, entidade patrocinadora do evento.

Desde a Confederación de Empresarios de Galicia insisten na necesidade de “acelerar os prazos, priorizar investimentos e culminar as infraestruturas que garantan a competitividade de Galicia nos mercados europeos e internacionais. Este corredor non é só unha obra física: é unha ferramenta de país, un proxecto de futuro. E por iso, instamos a todos os actores implicados a redobrar o compromiso, a non perder nin un minuto máis, e a facer do Corredor Atlántico un motor real de oportunidades para as empresas, os territorios e as persoas. Sigamos avanzando xuntos. Galicia necesítao. Galicia meréceo”.

Lembran que o plan director presentouse o pasado 16 de maio na Coruña e recentemente en Asturias, pero que se descoñece o texto do mesmo, “é vital contar con empresarios e organizacións para o deseño e implementación do plan, como parte directamente afectada, tanto en calidade de usuarios, como de operadores. E tamén é indispensable non só dispor do documento do plan, senón que constituír a comprometida comisión de seguimento / grupo de traballo coa Confederación de Empresarios de Galicia, que permita articular esta imprescindible cooperación público privada”.

Os imprescindibles para o empresariado

• Asegurar as partidas necesarias para abordar as infraestruturas pendentes nos prazos previstos. Preocupa a falta de presentación de proxectos ás convocatorias do Mecanismo Conectar Europa para actuacións en Galicia.

• Sen prexuízo de reivindicar as infraestruturas pendentes, pór en valor as existentes e o seu mantemento e modernización.

• Definir fórmulas que axilicen todos os permisos e trámites que frean investimentos importantes.

• Aposta firme pola cohesión e vertebración territorial do noroeste da Península Ibérica (ferrocarril, hidroducto, etc.), nunha situación de partida desfavorable respecto doutros territorios da UE, que penaliza a competitividade das nosas empresas no mercado único europeo e mundial.

FERROCARRIL

• Apostar pola intermodalidad e concluír a interconexión dos principais portos de Galicia co ferrocarril de mercadorías e modernizar as infraestruturas, para aumentar a eficiencia e a seguridade do transporte ferroviario.

MERCADORÍAS

• Desenvolver o Corredor Atlántico de Mercadorías, o seu financiamento e execución de aquí a 2030 (rede básica) e 2050 (rede global), incluído o Mecanismo Conectar Europa e os Fondos Next Generation EU.

• Impulsar a incorporación efectiva ao Corredor Atlántico ferroviario da conexión por Vigo-Ourense-Monforte, así como adiantar a da Coruña-Lugo Monforte.

• A incorporación efectiva do noroeste no mapa de autoestradas ferroviarias deseñadas polo Goberno de España e en particular á iniciativa “Mercadorías 30”.

• A falta de fiabilidade do material rodante é un dos principais motivos das incidencias nos servizos na liña Ferrol – Ribadeo. É imprescindible a mellora do material rodante e mantemento desta infraestrutura tan importante para o futuro de Alcoa (o principal reclamo de Feve era o aluminio, cun tren diario).

VIAXEIROS

• Concluír a liña de Alta Velocidade ferroviaria Madrid – Galicia.

• A pesar de porse en marcha os trens AVRIL e incorporado o cambiador de anchos: a vía de ancho internacional non chega á capital galega e a AVE non conecta as principais cidades, debido aos atrasos na súa finalización, como a renovación da vía Ourense-Monforte-Lugo.

• Pechar definitivamente a conexión das principais cidades de Galicia coa meseta por AVE e conseguir a conexión en tempos razoables: ao redor de 3 horas.

• Impulsar os tramos que faltan para completar a entrada da AVE a Ourense coa variante exterior de Ourense.

• Avanzar e axilizar os nodos de transporte que faciliten a conexión da AVE a Galicia con outros territorios, como a variante de Olmedo, que conecta con País Vasco e Cataluña sen pasar por Madrid.

• Imprescindibles as variantes de Vos Peares, Canabal e Rubián para alcanzar tempos competitivos desde Lugo a Ourense e Madrid.

• Licitación inmediata do baipás de Betanzos e unha planificación concreta e completa das melloras ferroviarias na liña Ferrol – A Coruña (electrificación da vía, apartaderos e rectificado de curvas) para reducir tempos. Determinación da localización da terminal de mercadorías que dea servizo ao porto de Coruña.

• Mellorar conexións ferroviarias dentro de Galicia para fomentar o desenvolvemento económico e a mobilidade da poboación. O feito de non ter rede de proximidade introduce unha importante discriminación no prezo dos billetes en Galicia con respecto a outras áreas que dispoñen de prezos de bonos mensuais de 20 € fronte aos 90 € en Coruña – Santiago.

• Axilización da execución de estacións intermodais (A Coruña, Ourense, Lugo).

SAÍDA SUR DE VIGO E CONEXIÓN CO PORTO

• É preciso un cronograma e un programa de investimentos para o saída sur de Vigo. Un calendario de actuacións para a execución da conexión da terminal ferroviaria de Bouzas, esencial para o porto de Vigo, tendo en conta a premisa de integración na cidade.

• A conexión por alta velocidade con Portugal debe ser prioridade con datas e orzamentos e con compromiso @decidido de Madrid e Lisboa. Necesitamos o compromiso do Goberno español no mesmo sentido para que Vigo e O Porto estean a 60 min e Vigo-Lisboa a 120 min.

ESTRADAS

• Faltan determinadas infraestruturas, así como exemplo e entre outras, a conexión por autovía entre Lugo e Ourense, as únicas capitais de provincia de España contiguas que non están conectadas por autovía, ou a A76 Ponferrada-Ourense e A72 Monforte- Chantada e a conexión entre ambas as e coa futura A56.

• Axilizar o mantemento e mellora das autovías das Rías Baixas e do noroeste.

A CEG aproveitou esta cita, para trasladar ao Goberno, a través do comisionado, para chamar á aposta pola especialización e coordinación dos aeroportos, facilitando unha conexión aérea competitiva, co resto de España e para saír a Europa e ao resto do mundo. “É preciso traballar na conexión e intermodalidad dos aeroportos de Galicia e destes coas demais infraestruturas de transporte”.

Así mesmo, tamén aludiron á AP-9 e iso aínda que poida ir máis aló das competencias do comisionado: “as súas peaxes a día de hoxe están entre os máis caros de España, provocando unha perda de competitividade para as nosas empresas. É imprescindible que a AP-9 sexa gratuíta, como vía fundamental que vertebra sen alternativas á maioría da poboación de Galicia. E neste punto, engadimos que Galicia é a comunidade con máis quilómetros de estrada suxeitas a peaxe. A incorporación de novas peaxes condicionaría aínda máis nosa competitividade, xa de seu penalizada. Deberían de terse en conta estas circunstancias antes de adoptar calquera medida”.