Desafíos da empresa actual: do compliance penal ao bo goberno organizativo – 03/06/2026

A gobernanza e o bo goberno deixaron de ser unicamente unha cuestión reputacional para converterse nunha ferramenta estratéxica de protección, sustentabilidade e crecemento.

A evolución do marco normativo en España e Europa reforzou especialmente a importancia do compliance penal e dos sistemas de prevención de delitos dentro das organizacións. Desde a incorporación da responsabilidade penal das persoas xurídicas no Código penal, as empresas poden ser consideradas penalmente responsables por delitos cometidos no seu beneficio se non dispoñen de modelos eficaces de organización, supervisión e control.

O bo goberno corporativo posiciónase como a principal liña de defensa para directivos, consellos de administración e organizacións. A implantación de estratexias de gobernanza eficaces, acompañadas de sistemas de compliance penal, permite non só previr condutas ilícitas, senón tamén acreditar ante autoridades, investidores e grupos de interese o compromiso real da empresa coa integridade e a dilixencia debida.

As Pemes, que constitúen a base do tecido empresarial, afrontan ademais un reto especialmente relevante: profesionalizar a súa xestión para competir en mercados onde a confianza, a rastrexabilidade e a sustentabilidade son xa factores decisivos. A implementación de estándares como a UNE 19601 ou a ISO 37301 permite ás organizacións desenvolver sistemas estruturados de prevención, detección e resposta fronte a riscos penais e regulatorios; as certificacións de compliance e bo goberno son un elemento diferenciador no mercado, que pode reforzar o posicionamento ESG, a confianza de investidores e a seguridade xurídica das operacións.