Juan Manuel Vieites, actual presidente da Confederación de Empresarios de Galicia (CEG), recibiu esta mañá na Cidade da Cultura de Santiago o premio honorífico dos Premios Galicia Alimentación 2022 da Agrupación industrial Alimentaria de Galicia (Clusaga) pola súa contribución como socio fundador desta organización e o seu inxente labor impulsando a I+D+i no sector alimentario galego -en particular no complexo mar industria-, a través do seu cargo como secretario xeral de Anfaco-Cecopesca durante os últimos 31 anos, función da que se despediu o pasado mes de maio, e vinculado ao sector mar alimentario de Galicia durante os últimos 42 anos.
Vieites recibiu o galardón de mans da conselleira do Mar, Rosa Quintana, e durante a súa intervención destacou “o orgullo e privilexio que lle supoñía traballar de xeito conxunto co Clusaga desde a súa creación”, e agradeceu á Xunta Directiva da Agrupación industrial a concesión da distinción.
Ademais, insistiu no desempeño do “traballo en equipo con implicación e profesionalidade como valores que teñen que persistir no Clusaga do futuro" e animounos a “buscar novas oportunidades para crecer e alcanzar unha mellor economía - moderna e cohesionada, incrementando o valor engadido-“, “un reto que debe ser compartido por Administración, axentes económicos e sociedade civil, desde a competitividade e a diversificación”.
