CEG, FADE e FELE reclaman avanzar cara á eliminación das barreiras económicas e garantir unha mobilidade en Asturias, Castela e León e Galicia equiparable á existente noutros territorios

A Confederación de Empresarios de Galicia (CEG), a Federación Asturiana de Empresarios (FADE) e a Federación Leonesa de Empresarios (FELE), xunto con representantes dos Gobernos de Asturias, Castela e León e Galicia, mantiveron, hoxe, en Santiago de Compostela, unha reunión de traballo para analizar a situación das principais infraestruturas viarias do corredor do noroeste e avanzar nunha posición común en defensa da competitividade, a cohesión territorial e a igualdade de oportunidades para cidadáns e empresas.

A cita reuniu á presidenta da Federación Asturiana de Empresarios, María Calvo; ao presidente da CEG, Juan Manuel Vieites; á conselleira de Vivenda e Planificación de Infraestruturas da Xunta de Galicia, María M. Allegue; á secretaria xeral de Mobilidade e Transformación Dixital da Xunta de Castela e León, Natalia Flórez; ao conselleiro de Mobilidade, Medio Ambiente e Xestión de Emerxencias do Principado de Asturias, Alejandro Jesús Calvo; ao director rexional de Galicia Norte do Banco Sabadell, David Martís; e ao presidente de EN-COLECTIVO e CEO de MundiNova, Diego Maraña.

Durante o encontro púxose de manifesto que Asturias, Castela e León e Galicia comparten unha mesma realidade: “a existencia de importantes infraestruturas de alta capacidade suxeitas a peaxes que xeran sobrecustos para as empresas, encarecen a mobilidade de traballadores e mercadorías e restan competitividade aos territorios do noroeste respecto doutras zonas de España”.

CEG, FADE e FELE consideran necesario impulsar unha estratexia coordinada, tanto coas administracións participantes como co Goberno de España e todos os axentes implicados, “que permita avanzar cara á progresiva eliminación destas barreiras económicas e garantir unhas condicións de mobilidade equiparables ás existentes noutros corredores estratéxicos do país”.

No caso de Galicia, o presidente da CEG, Juan Manuel Vieites, sinala que “a AP-9 constitúe unha infraestrutura esencial para a vertebración económica e social da comunidade. O seu carácter estratéxico esixe solucións que permitan reducir de forma efectiva a carga económica que soportan usuarios e empresas, avanzando cara a un escenario de gratuidade progresiva e consolidando mentres tanto as bonificacións existentes”.

Así mesmo, valorou a necesidade de que “calquera decisión sobre o futuro desta infraestrutura garanta a sustentabilidade financeira de Galicia e contribúa a resolver definitivamente o problema das elevadas peaxes que afectan á competitividade do tecido produtivo galego”.

Engade que “non é unha cuestión de privilexios, senón de igualdade de oportunidades. Máis aló da titularidade ou do modelo de xestión, o fundamental é que se garanta unha solución que permita mellorar a competitividade de Galicia e que non traslade novos custos aos cidadáns. A mobilidade é hoxe un factor de competitividade económica e non podemos permitir que as nosas empresas sigan operando en condicións menos favorables que as doutros territorios. Chegou o momento de avanzar cara a un modelo de mobilidade máis xusto, máis competitivo e máis equilibrado para todos”.

Pola súa banda, a presidenta de FADE, María Calvo, reiterou a necesidade de atopar unha solución definitiva para a AP-66, Autoestrada do Huerna, unha reivindicación histórica da sociedade e do tecido empresarial asturiano, especialmente relevante no actual contexto de afeccións derivadas das obras e limitacións que afectan á mobilidade entre Asturias e a Meseta.

Así mesmo, sinalou que “a peaxe do Huerna supón un sobrecusto estrutural para as empresas asturianas, encarece a mobilidade de mercadorías e persoas e penaliza a competitividade do Principado respecto doutros territorios”. Neste sentido, lembrou que FADE, xunto coas patronais asturianas do transporte: ASETRA-CETM Asturias, ASTRA, CESINTRA, ASVIPYMET e CAR, interpuxo un recurso contencioso-administrativo ante o Tribunal Supremo contra a negativa do Goberno de España a revisar de oficio a prórroga da concesión da AP-66, aprobada no ano 2000 e vixente até 2050.

María Calvo, defendeu que a eliminación desta barreira económica “é unha cuestión estratéxica para Asturias e para o conxunto do noroeste, porque afecta directamente á industria, á loxística, ás exportacións e á capacidade de competir en igualdade de condicións”.

Igualmente, púxose de relevo a importancia de abordar a situación das infraestruturas de peaxe que afectan á provincia de León e ao conxunto de Castela e León, garantindo conexións eficientes e competitivas co resto do corredor atlántico. O presidente de FELE, Juan María Vallejo, subliñou que “León non pode seguir soportando barreiras que condicionan o seu desenvolvemento económico, a súa capacidade loxística e a súa conexión natural co resto do noroeste”.

Respecto da AP-66, Vallejo lembrou que non é unha autoestrada calquera, senón “a principal conexión de Asturias coa meseta”. O presidente de FELE sinalou ademais que, para moitas empresas, esta peaxe non representa un gasto ocasional, senón “un custo estrutural que se repite todos os días e que penaliza directamente a competitividade do tecido produtivo leonés”.

Así mesmo, fixo referencia á peaxe da AP-71, León-Astorga, outra infraestrutura crave para a vertebración interna da provincia e para a conexión con Galicia e o importante e crecente Polígono de Villadangos.

CEG, FADE e FELE coincidiron en reclamar ao Goberno de España unha visión estratéxica para o noroeste peninsular que contemple:

• O impulso de medidas que permitan avanzar cara á gratuidade ou redución substancial das peaxes existentes.
• A modernización e mellora das autoestradas que vertebran o corredor do noroeste.
• A execución de investimentos pendentes en infraestruturas viarias e loxísticas.
• O fortalecemento da conectividad entre Galicia, Asturias e Castela e León.
• A consideración do corredor atlántico como unha prioridade para a cohesión territorial e a competitividade económica de España.

As entidades participantes han acordado manter unha liña de traballo permanente e coordinada para defender de forma conxunta estas reivindicacións ante as institucións nacionais e europeas.

O noroeste representa un dos principais polos industriais, loxísticos, enerxéticos e exportadores do país. Garantir unhas infraestruturas modernas, eficientes e accesibles constitúe unha condición imprescindible para favorecer o crecemento económico, atraer investimentos e xerar emprego de calidade nos nosos territorios.

Durante o encontro os representantes dos gobernos de Asturias, Castela e León e Galicia referendaron a súa posición compartida respecto do procedemento de infracción INFR(2021)4052 incoado pola Comisión Europea contra o Reino de España en relación coas concesións das autoestradas AP-9 e AP-66 (Huerna) e coas prórrogas concesionales de ambas as infraestruturas. Por iso, asinaron un acordo coas entidades empresariais presentes.

As entidades asinantes consideran que a fortaleza do proxecto europeo descansa na aplicación efectiva e uniforme das normas comúns en todos os Estados membros. A seguridade xurídica, a confianza dos operadores económicos e a credibilidade das institucións europeas esixen que os procedementos previstos nos Tratados permitan alcanzar conclusións claras e definitivas cando a propia Comisión apreciou a existencia de incumprimentos da legalidade europea.

En consecuencia, transcorrido o prazo concedido pola Comisión ao Estado sen que este adoptase medida algunha, e dado que non procede outra actuación que a continuación da tramitación do procedemento de infracción, resulta imprescindible asegurar o cumprimento dos mecanismos de control establecidos.

Por iso, entenden que o procedemento alcanzou un grao de madurez que fai especialmente conveniente o seu avance diligente cara ás fases posteriores previstas no ordenamento da Unión Europea, permitindo que as cuestións expostas poidan resolverse de forma definitiva a través dos mecanismos institucionais correspondentes.

Os gobernos autonómicos e as organizacións empresariais asinantes reafirman a súa vontade de actuar de maneira coordinada en defensa dos intereses xerais do noroeste de España, impulsando unha alianza estable entre as institucións públicas e o tecido produtivo dos territorios para promover a culminación deste procedemento e a plena aplicación dos principios que inspiran o Mercado Único Europeo.

Así mesmo, acordan manter unha interlocución permanente coas institucións europeas e co conxunto de actores implicados, co obxectivo de trasladar a importancia económica, social e territorial que esta cuestión ten para Galicia, Asturias e Castela e León, así como para o conxunto do corredor atlántico do noroeste peninsular.

Finalmente, fan un chamamento para que a resolución deste asunto contribúa a reforzar a confianza de cidadáns, empresas e institucións na vixencia efectiva do Estado de Dereito europeo e nos principios de transparencia, competencia, igualdade de trato e seguridade xurídica que constitúen a base do Mercado Único.

Por último, levouse a cabo a presentación da ?Alianza do Noroeste AP-9 e AP-66?. O presidente de ENCOLECTIVO e CEO de MundiNova, e Diego Maraña explicou a orixe da iniciativa, o seu percorrido ante a Comisión Europea, a situación actual tras o ditame motivado e trasladou a necesidade dunha alianza transversal do noroeste.