A Confederación de Empresarios de Galicia (CEG) valora positivamente a decisión da Consellería de Sanidade de apostar pola automatización das baixas e as altas no mesmo acto, como xa se está facendo noutras comunidades autónomas como Baleares, Cantabria, Melilla e Navarra, e dada a situación de grave prexuízo que están a sufrir as empresas de Galicia durante esta sexta onda da pandemia por mor do colapso que están a soportar os centros de saúde e os médicos de cabeceira para xestionar o gran volume de casos xerados.
A medida permitirá dar cumprimento á corentena estipulada por Sanidade cun período de incapacidade de sete días, sen prexuízo de que a persoa traballadora acuda ao seu médico de cabeceira en caso de non estar recuperado e ampliar así o período de baixa.
Esta solución contribuirá ademais -segundo a CEG-, e tendo en conta que os recursos son sempre limitados e que deben ser optimizados, a mellorar a atención da poboación que ben polo mencionado virus ou ben por outras patoloxías precise de atención dos servizos de atención primaria.
Lamenta a CEG que non se produciu aínda un cambio normativo por parte do Ministerio de Seguridade Social que habilite expresamente a automatización de altas e baixas simultaneamente, cuestión trasladada insistentemente polos empresarios ao Ministerio e en todo caso valora positivamente o paso diante de Galicia neste sentido, pois as circunstancias actuais apreman.
Do mesmo xeito, a CEG defende unha maior colaboración e aproveitamento dos recursos médicos de Mutuas e Médicos de Empresa para axudar a desconxestionar os centros de atención primaria, tanto para a comunicación de resultados de diagnóstico, cuestión na que xa se está traballando coa Consellería de Sanidade, como en valorar a posibilidade de que as mutuas colaboradoras da Seguridade Social poidan facerse cargo da emisión dun alta e unha baixa daqueles pacientes positivos pero asintomáticos que requiren unha corentena de sete días, cuestión para a que si sería necesaria unha modificación normativa a nivel estatal.
Noutra orde de cousas, a Confederación de Empresarios de Galicia tamén considera preocupante como se xeneralizou o autodiagnóstico a través dos test de antígenos, á marxe dun diagnóstico e dun seguimento por parte dos profesionais sanitarios, que é ao seu modo de ver o máis indicado. Para ese efecto, é preciso con carácter extraordinario que se habiliten todos os recursos, tanto públicos como privados, para apoiar ao sistema público de saúde nestas funcións.
