Reunión co viceministro de Emprendemento e Tecnoloxía de Polonia

Os vicepresidentes da Confederación de Empresarios de Galicia (CEG) Antonio Fontenla Ramil e Jaime Luis López Vázquez; o vicepresidente da Confederación de Empresarios de Ourense (CEO) Alejandro Cruz Iglesias; así como representantes das empresas do Consello Asesor da confederación e do sector tecnolóxico e loxístico galego reúnense co viceministro de Emprendemento e Tecnoloxía de Polonia, Marcin Ociepa, para abordar novas posibilidades de cooperación económica entre ambas áreas xeográficas.

A importancia estratéxica da economía polaca, unha das máis dinámicas da UE e cun mercado en crecemento continuo, converten ao país nun destino de gran interese tanto para a exportación galega como española. A realidade é que as relacións entre España e Polonia téñense intensificado recentemente xa que se manteñen con regularidade cumes bilaterais de alto nivel e o comercio entre ambas partes medra cada ano.

O viceministro de Emprendemento e Tecnoloxía de Polonia expuxo que o seu Goberno pretende centrarse nas rexións, concretamente en “emparellar empresas por sectores e por rexións” porque “cada unha – como é o caso de Galicia-, ten o seu perfil particular e pode axudarnos a conseguir unha simbiose empresarial perfecta”. Nesta liña, Marcin Ociepa anunciou a celebración dun Cumio Empresarial Rexional no próximo mes de setembro en Polonia con participación de gobernos rexionais de toda Europa, representantes dos negocios, cámaras de comercio, organizacións de traballadores e universidades, e invitou ás empresas presentes a participar na mesma.

Pola súa parte a CEG destacou que a colaboración entre as dúas áreas xeográficas ten sido esencial para a internacionalización de empresas galegas no país europeo.