Os socios das redes de apoio ás empresas da Comisión Europea en Galicia presentan, no Porto de Celeiro, os servizos e proxectos en materia de innovación, internacionalización e competitividade

Os socios das redes de servizos a empresas da Comisión Europea en Galicia (Confederación de Empresarios de Galicia, Enterprise Europe Network, Axencia Galega de Innovación – GAIN, UNINOVA, a Cámara de Comercio de Santiago de Compostela e Erasmus for Young Entrepreneurs) celebraron a xornada informativa “Europa ao servizo das empresas de Galicia: innovación, internacionalización e competitividade”, na que se abordou, por unha banda o futuro do mar e a pesca en Europa.

No evento participou o director xeral de Pesca da Consellería do Mar, Isaac Rosón Sánchez Brunete e o presidente do Consello Consultivo da Frota de Longa Distancia da UE (LDAC), Iván López Van Der Veen.
A apertura contou co director adxunto do Porto de Celeiro, Eduardo Míguez; a directora da Axencia Galega de Innovación (GAIN), Carmen Cotelo, e o presidente da Confederación de Empresarios de Galicia (CEG), Juan Manuel Vieites; e a conselleira do Mar, Marta Villaverde.

Doutra banda, expuxéronse os servizos a disposición das empresas que Europa dispón en Galicia. Para iso, contaron coa participación da xefa de Unidade da Axencia Executiva do Consello Europeo de Innovación e das Pemes (EISMEA) da Comisión Europea, Natalia Martínez Páramo, quen ofreceu unha visión sobre o papel da Unión Europea no impulso á innovación, a internacionalización e a competitividade das pequenas e medianas empresas.

Natalia Martínez Páramo, cunha traxectoria de máis de tres décadas na Comisión Europea, é actualmente responsable do alicerce dedicado ás pemes dentro do Programa para o Mercado Interior (Single Market Programme – SMP). Desde EISMEA dirixe algunhas das principais iniciativas europeas de apoio ao tecido empresarial, entre elas a Enterprise Europe Network, o programa Erasmus para Mozos Emprendedores, que foron presentadas durante a xornada, e outras iniciativas como a de apoio aos clústeres empresariais, as accións destinadas a reforzar a competitividade e a sustentabilidade do sector turístico e diversas actuacións en materia de propiedade intelectual.

A Cámara de Comercio de Santiago de Compostela e Uninova son os socios galegos do programa Erasmus para Mozos Emprendedores, programa que, o pasado mes de maio, superou os 15.000 intercambios empresariais desde a súa creación, consolidándose como unha das iniciativas europeas de maior éxito para fomentar o emprendimiento, a innovación e a internacionalización das pequenas e medianas empresas.

O programa permite que persoas que están a crear unha empresa ou contan con menos de tres anos de experiencia empresarial realicen unha estancia de entre un e seis meses xunto a un empresario experimentado noutro país participante. Durante este intercambio, os novos emprendedores adquiren coñecementos prácticos sobre xestión empresarial, fortalecen o seu plan de negocio e desenvolven unha rede internacional de contactos. Ao mesmo tempo, as empresas de acollida incorporan novas ideas, talento internacional e unha valiosa perspectiva que favorece a innovación, a apertura a novos mercados e a creación de alianzas estratéxicas.

Entre os casos de éxito presentados, estiveron Sabela Gippini Ruiz, fundadora e directora de Galiwonders, axencia galega especializada en viaxes e experiencias no Camiño de Santiago e o norte de España. Como empresaria de acollida do programa Erasmus para Mozos Emprendedores, compartiu a súa experiencia recibindo na súa empresa a un mozo emprendedor procedente de Ucraína.

Galicia conta cunha sólida traxectoria na implementación do programa Erasmus para Mozos Emprendedores e os dous socios do proxecto en Galicia xestionaron máis de 450 intercambios e contan cun acumulado de máis de 100 execucións dentro dos seus proxectos vixentes como organización intermediaria. Estes resultados consolidan a Galicia como un dos territorios con maior experiencia no desenvolvemento do programa Erasmus para Mozos Emprendedores.

A Confederación de Empresarios de Galicia e GAIN son os socios galegos da Enterprise Europe Network: a rede de apoio e asesoramento a empresas máis importante a nivel mundial e que conta con presenza en 59 países ao longo dos 5 continentes, con 577 socios, máis de 4000 técnicos e con oficinas en todas as rexións da UE.

Os socios da EEN en Galicia promoven e asesoran ás empresas no seu acceso e participación a programas financiados pola UE, especialmente en materia de i+D+i pero tamén en materia de competitividade. Contan cunha base de datos compartida por todos os membros da rede para buscar socios comerciais, socios tecnolóxicos e socios para participar en proxectos internacionais.

A EEN tamén pon a disposición das empresas de Galicia servizos de información e asesoramento á internacionalización, especialmente dedicado á libre circulación e libre prestación de servizos ao longo da Unión Europea, ou servizos en materia de sustentabilidade entre outros.

Ademais, tamén contribúen á identificación e traslado á Comisión Europea de barreiras e obstáculos das empresas no mercado interior europeo e promoven a participación das empresas de Galicia no proceso de elaboración de novas políticas e normativas europeas, a través de consultas e paneis de empresas.

Entre os casos presentados da rede EEN, expuxeron os servizos recibidos por parte da EEN, Miguel Díaz, CEO e fundador de DUMMY RESCUE, cuxa empresa creou un sistema integrado de procura e rescate acuático; Carlos de Troia, CEO e Fundador de Troyan Drones, startup de base tecnolóxica e especializada en solucións avanzadas para navegación marítima autónoma; e Javier Taibo, fundador de Anthylis Consulting, empresa de consultoría.

Eurochambres colaborou na organización da xornada como responsable da Oficina de Soporte do programa Erasmus para Mozos Emprendedores (Erasmus for Young Entrepreneurs – EYE).

A Confederación de Empresarios de Lugo, organización integrada na CEG e que promove e ofrece os servizos desta a través da EEN, así como a Cámara de Comercio Industria e Navegación de Lugo, colaboraron na organización desta xornada.

A xornada pechouse coas palabras da alcaldesa de Viveiro, María Carmen Gueimunde González, quen agradeceu iniciativas deste tipo para dar a coñecer estes programas e promover a participación entre as empresas da zona.