A CEG busca xerar oportunidades de investimento entre Galicia e China, nun foro que contou co embaixador chinés Yao Jing

A Confederación de Empresarios de Galicia (CEG) en colaboración con SW SPAIN, organizou xunto coa Cámara Oficial de Comercio, Industria, Servizos e Navegación de Santiago de Compostela o Foro Empresarial “Oportunidades de cooperación e investimento entre empresas galegas e chinesas”, en Santiago de Compostela. Un evento que contou coa participación do embaixador da República Popular China en España, Yao Jing.

Dende a CEG explican que este foro foi un punto de encontro para identificar sinerxías, explorar novas alianzas e xerar oportunidades de cooperación e investimento entre Galicia e China.

China consolidouse nos últimos anos como un socio comercial de referencia para Galicia. Aínda que as nosas exportacións ao xigante asiático representan aínda menos do 1 % do total galego -217 millóns de euros en 2024, segundo os últimos datos da Secretaría de Estado de Comercio-, o país converteuse xa no principal destino das nosas vendas en Asia e, o que é máis relevante, nun mercado cun potencial de crecemento extraordinario.

Polo lado das importacións, os intercambios superan os 2.000 millóns de euros anuais, o que reflicte ata que punto a economía chinesa está presente no noso día a día: desde compoñentes industriais até bens de consumo que abastecen ás nosas empresas e fogares. Só en 2023 máis de 290 empresas galegas exportaron a China e máis de 6.000 importaron mercadorías procedentes de alí, con compañías galegas que levan décadas implantadas no país asiático e construíron relacións estables.

Esta vinculación vai moito máis alá do simple intercambio de mercadorías. China é un dos maiores investidores estranxeiros no noso país, con presenza crecente en sectores estratéxicos como enerxía, automoción, enxeñaría, loxística e turismo. Nos últimos anos vimos como grandes grupos chineses avaliaron novos investimentos en Galicia, interesándose por sectores de alta tecnoloxía, desenvolvemento de novos materiais, servizos financeiros, urbanismo sustentable e enerxías limpas, ámbitos nos que Galicia ofrece capacidades competitivas e talento.

Ademais, a Xunta de Galicia, a través do IGAPE e a súa Oficina Económica en Shanghái, está a reforzar os instrumentos de apoio para captar este tipo de proxectos, facilitar os trámites, acompañar ás nosas empresas na súa internacionalización e ofrecer seguridade xurídica e acompañamento aos investidores. Todo iso configura un escenario no que Galicia e China poden pasar de ser meros socios comerciais a converterse en aliados estratéxicos en innovación, industria e sustentabilidade.

Oportunidades de cooperación

• No sector agroalimentario, Galicia consolidouse como líder europeo en produtos do mar e conta cunha industria transformadora de prestixio internacional. En 2024 os produtos lácteos (79 M€) e os peixes, crustáceos e moluscos (72 M€) representaron en conxunto ao redor do 70 % do total exportado por Galicia ao mercado chinés. Pola súa banda, China é un dos maiores mercados de consumo de peixe e marisco do mundo e valora cada vez máis a calidade e a trazabilidade.
• Na automoción e a mobilidade eléctrica, o noso polo industrial de Vigo pode ser un socio idóneo para empresas chinesas que busquen implantarse en Europa ou desenvolver proxectos conxuntos en compoñentes, loxística e tecnoloxía.
• En enerxías renovables e economía verde. Galicia posúe os recursos para liderar en liderar en Europa en eólica terrestre e mariña, hidróxeno verde, biocombustibles e minería estratéxica; China lidera a produción mundial de tecnoloxías limpas.
• En dixitalización e comercio electrónico, as pemes galegas poden apoiarse na experiencia e as plataformas chinesas para dar o salto internacional.
• E en turismo e cultura, reforzar esa promoción conxunta do Camiño de Santiago: só no que vai de ano máis de 2.500 peregrinos chineses recolleron a compostelá.

O presidente da Confederación de Empresarios de Galicia, Juan Manuel Vieites, asegura que queren “facilitar misións comerciais, encontros empresariais e proxectos conxuntos. Queremos acompañar ás empresas galegas que buscan exportar máis e mellor a China e asesoralas para adaptarse ao mercado. E queremos contribuír a atraer investimento estratéxico que xere emprego de calidade, transferencia tecnolóxica e innovación. Por iso encontros como este son tan valiosos: permiten que as administracións e as organizacións empresariais escóitense e actúen xuntas para achandar o camiño”.

Así mesmo, incide en que “para aproveitar plenamente o potencial da relación con China necesitamos axilizar trámites, dispor de solo industrial ben comunicado, formar ás nosas empresas e seguir mellorando as nosas infraestruturas e a nosa oferta de servizos avanzados”.

No foro participaron: Juan Manuel Vieites, presidente da CEG; Jorge Lorenzo, vicepresidente primeiro da Cámara de Comercio de Santiago de Compostela; José González, conselleiro de Emprego, Comercio e Emigración da Xunta de Galicia; María Jesús Lorenzana, conselleira de Economía e Industria; Yao Jing, embaixador da República Popular China en España; Álvaro Pericas Ruiz, Socio SW Spain; Lan Xu, manager SW Spain; Kaiyu Yang, presidente da Cámara de Comercio China en España (CCINCE); Myriam Pérez, directora provincial da Dirección Territorial de Comercio (ICEX); Loreta Calero, CEO SW Spain; Javier Pablo Santorio, responsable de Xestión COMEX Galicia (ABANCA); Yang Yi, codirector e director xeral de China Road & Bridge Spain Investment Company e vicepresidente de Grupo Pontes España; Wang Yong, executivo de Conservas Albo; Lois Fernández, China Operations de Pesciro; Marcos Rodríguez Godoy, greater China director de Estrella Galicia; José Alberto González-Ruiz, secretario xeral da Confederación Española de Organizacións Empresariais (CEOE); e Ana Pumar, socia SW Spain en Galicia.