CEG

 

É a hora do consenso

É a hora do consenso

Aínda que valores como unidade, responsabilidade e civismo son síntomas dunha sociedade forte, intelixente e avanzada, agora máis que nunca se presentan tamén como inherentes ao vencemento desta pandemia que nos sacode, así como do impulso definitivo para a recuperación económica e social de Galicia. Son valores cidadáns, das institucións, dos representantes da sociedade civil, e tamén, como non, da patronal galega.

A CEG así o entende, e por iso decidimos convocar eleccións en aras de atopar de forma consensuada o candidato forte que integre a voz articulada do empresariado na defensa dos seus lexítimos intereses neste momento histórico de xestión en tempos de  covid. Debemos remar todos xuntos no sorteo da crise que azouta a nosa comunidade, así como
tomar decisións idóneas ante unha revolución industrial que mutará totalmente o noso modelo produtivo e #ante o tren das axudas do Fondo de reconstrución europeo para Galicia.

Está fóra de toda dubida que a situación de provisionalidade debe chegar ao seu termo, do mesmo xeito que creo necesario deixar claro que a pesar do período transitorio que viviu a CEG, esta cumpriu coa súa imprescindible función representativa e social que lle outorga a Constitución Española.

Así, e como non podería ser doutra maneira, non deixamos de participar activamente no Diálogo Social; coa firma dos “Acordos para avanzar cara a unha Galicia máis igualitaria e sostible” a finais do 2019; coa rúbrica da “Declaración para a reactivación económica e social de Galicia”, a finais do pasado mes de outubro; coa intervención en encontros regulares coa Comisión de coordinación e seguimento do COVID-19 para abordar as cuestións de interese derivadas da pandemia; e coa nosa participación activa nos órganos de goberno empresariais de carácter estatal, entre outras actuacións.

Toca agora seguir avanzando, tamén porque a provisionalidade non pode ser a norma e ademais resulta moi  fatigosa. É a hora do consenso.

Artigo publicado o pasado día 17 de outubro no diario La Voz de Galicia.

 

TwitterFacebook

Usamos cookies no noso sitio web para soportar características técnicas que melloran a súa experiencia de usuario.

Tamén usamos servizos de análise e estatísticas.