Comunicado de prensa
Vaia por diante que a Confederación de Empresarios de Galicia (CEG) respecta as últimas medidas adoptadas onte e vai cumprilas, como non podía ser doutra maneira. Temos claro que o prioritario é a saúde das persoas.
Pero é evidente que desde o punto de vista económico, estas novas decisións ameazan con crear unha crise económica e social sen precedentes, comprometendo seriamente salvagárdaa do máximo número de empresas e traballadores, sobre todo a partir de mañá.
As decisións do Goberno en momentos de crises deben ser moi meditadas e equilibradas para evitar o agravio da situación xa de por se dramática que están a atravesar as empresas, en Galicia fundamentalmente pemes e autónomos, e que non provoquen unha destrución masiva de tecido empresarial e do emprego de maneira definitiva.
As políticas adoptadas polo Executivo nas últimas xornadas non fixeron máis que contribuír ao desconcerto e á incerteza do empresariado e dos traballadores.
ERTES
En primeiro lugar, porque aínda que en teoría o Goberno facilitou un procedemento extraordinario para as empresas en dificultades a través dos ERTE, tampouco resultou ser un cheque en branco da flexibilidade como a que se precisa nestes momentos.
Se as empresas sempre necesitan unha marxe de tempo para poder adaptarse a novas circunstancias, máis nestes momentos tan tráxicos. A pesar diso, o Goberno impuxo determinadas condicións e advertencias para o acceso a este recurso.
Por unha banda, a obrigación de manter o emprego unha vez terminase o Expediente de Regulación de Emprego Temporal polo menos durante seis meses xera unha importante incerteza aos empresarios xa que non saben se van poder cumprir.
Ademais, a advertencia recollida no Real Decreto do pasado venres, día 27 de marzo, sobre os controis a posteriori de todos os ERTES e a devolución das axudas concedidas se o Ministerio de Traballo considera que non se cumpren os requisitos esixidos, alerta excesivamente a uns empresarios que o que menos desexarían nestes momentos é ter que mandar aos seus traballadores ás súas casas por baixa ou nula produción e moito menos botar o peche.
DESPEDIMENTOS
Tamén o venres foi o día no que o Goberno nos alertou coa imposibilidade de despedir mentres durase a crise, xa que calquera redución de persoal tería a consideración de despedimento nulo, aclarando horas despois que os despedimentos si serían posibles pero cun custo moito maior; é dicir dunha indemnización de 20 días por ano traballado cun máximo de 12 mensualidades (despedimento procedente), só quedaría a opción de acollerse ao despedimento improcedente pagando ao traballador 33 días por ano traballado cun máximo de 24 mensualidades.
Neste sentido pedimos ao Goberno máis concreción, porque nin sequera matizando quédanos claro que pagando por un despedimento improcedente despois non o considere nulo, coas consabidas consecuencias como son a readmisión do traballador e o pago dos salarios non cobrados desde a data do despedimento ata a da notificación da sentenza.
A CEG considera que sempre fose mellor a adopción doutras medidas como reducir ou suspender o pago de impostos en lugar de abrir unha liña de avais para cubrir os préstamos que buscan facer fronte aos mesmos; a flexibilidade e axilidade no acceso aos ERTES sen posibilidade de sanción a posteriori; e a ampliación da cobertura por desemprego durante todo o tempo que dure o parón económico, entre outras
Finalmente e con respecto á medida tomada onte, a patronal galega manifesta a total inoportunidad da data elixida xa que é final de mes e hai que facer fronte aos pagos; e reclama a necesidade de coñecer con urxencia a lista taxativa das actividades que se consideran esenciais para poder adoptar as medidas oportunas.
