A Confederación de Empresarios de Galicia (CEG) organizou un almorzo-coloquio con Francisco José Prieto, arcebispo de Santiago de Compostela; os membros do consello asesor e as organizacións integradas na CEG. O evento contou co patrocinio de Banco Sabadell e coa participación do director xeral de Sabadell Galego e director xeneral adxunto de Banco Sabadell, Pablo Junceda.
Durante o encontro, o presidente da CEG subliñou que "os empresarios e empresarias somos conscientes da responsabilidade e papel que temos, de contribuír ao desenvolvemento da nosa sociedade que transcorre a unha velocidade vertixinosa, respondendo os retos que se nos expoñen, é dicir, un compromiso coa responsabilidade social, a sustentabilidade, a igualdade, etc., porque a actividade empresarial é un alicerce fundamental na construción dunha economía sustentable e xusta".
Juan Manuel Vieites destacou que "as empresas incorporaron a ética e a sostibilidade dende sempre na súa actividade. Pero debemos ser cada vez máis transparentes ante os nosos provedores, clientes, administracións e ante a cidadanía. Isto implica non só facer moitas cousas e facelas moi ben, senón tamén ser capaces de polas en valor e dalas a coñecer".
Así tamén chamou a non esquecer que "a empresa non pode ser un ente logarítmico, senón un espazo no que os principios e as relacións humanas atopen un espazo para a súa realización".
Neste sentido, lembraron que a Confederación de Empresarios de Galicia, a través do Arcebispado de Santiago de Compostela, adheriuse á campaña que Cáritas ten aberta para dar resposta á situación de emerxencia xerada polas recentes inundacións no Levante español.
"O apoio das empresas galegas, organizado en parte a través de CEG, destaca o rol das organizacións empresariais e as iniciativas privadas como forzas movilizadoras de recursos e concienciación social, o que converte ás empresas en aliadas fundamentais en situacións de emerxencia. Esta participación reafirma que, en situacións de catástrofe, as empresas poden ser parte esencial da solución, contribuíndo de maneira rápida e eficiente para axudar a quen máis o necesitan", asegurou o presidente do empresariado galego.
Con esta demostración de responsabilidade social das empresas galegas, -afirman-, "reafírmase o seu compromiso como axentes de cambio, líderes no apoio ás súas comunidades e colaboradoras imprescindibles no intento por paliar os efectos dunha catástrofe sen precedentes que deixa comunidades esnaquizadas e vidas perdidas".
Por outra banda, desde a CEG aproveitaron o encontro para falar do ano santo Xacobeo. Consideran fundamental a articulación de incentivos fiscais e empresariais para aquelas empresas que participen activamente na promoción e o desenvolvemento de eventos relacionados co Xacobeo e contribúan a mellorar e incrementar os servizos e iniciativas vinculadas ao mesmo.
Inciden en que tanto os beneficios fiscais, así como as axudas "motivarán a máis empresas a involucrarse no desenvolvemento de proxectos que fortalezan o atractivo do Xacobeo. Estas medidas contribuirían ao crecemento económico rexional, creando emprego e fomentando a innovación en sectores crave como o turismo, a hostalaría e o comercio local".
Ademais, sinalan que incentivos adicionais, como subvencións ou apoios loxísticos, poderían facilitar a participación de pequenas e medianas empresas. "Isto non só promovería unha maior diversificación empresarial, senón que tamén garantiría un desenvolvemento máis equitativo e sustentable en toda Galicia".
Así mesmo, valoran positivamente a decisión do Consello Xacobeo, consistente en que os beneficios fiscais para as empresas que apoien o Xacobeo 2027 amplíense a tres anos.
O Xacobeo 2021-2022 xerou un impacto económico superior aos 1.200 millóns de euros para Galicia. Empresas grandes e pequenas viron incrementados os seus ingresos grazas ao fluxo de máis de 7 millóns de visitantes, que á súa vez crearon ao redor de 11.000 empregos directos e outros tantos indirectos.
Por iso, afirman que o Xacobeo non só é un evento económico, "senón tamén un emblema da identidade cultural galega. Cada ano, miles de peregrinos de máis de 150 países realizan o Camiño de Santiago, situando a Galicia no mapa mundial. Este fluxo de visitantes, atraídos pola riqueza cultural e patrimonial da rexión, eleva a reputación de Galicia como un destino de primeira orde, o que repercute positivamente na percepción das empresas galegas no exterior".
Vieites concluíu que a posta en marcha de incentivos fiscais e empresariais por parte das distintas administracións competentes "non só é necesaria, senón que é unha estratexia crave para maximizar o impacto positivo do próximo Xacobeo 2027 na economía galega. Dende a CEG cremos que non só fortalecería o tecido económico de Galicia, senón que tamén consolidaría a súa reputación cultural e prestixio internacional. Este enfoque integrado asegura que o Xacobeo siga sendo un alicerce fundamental para a economía galega e un patrimonio común a preservar e potenciar desde Galicia e para Galicia".
