A CEG reclama transparencia e garantías para que Galicia non quede á marxe da rede ferroviaria europea

A Comisión de Infraestruturas da Confederación de Empresarios de Galicia (CEG) celebrou, unha reunión extraordinaria na que analizou as informacións coñecidas nos últimos días sobre unha posible renuncia do Goberno de España á implantación do ancho ferroviario europeo, en cumprimento do Regulamento 2024/1679 que establece os requisitos que deben cumprir as infraestruturas de transporte da rede TEN-T.

Tras analizar a escasa información que transcendeu sobre o informe remitido polo Ministerio de Transportes e Mobilidade Sustentable á Comisión Europea, no que se podería cuestionar a viabilidade de adaptar a rede ferroviaria convencional española ao ancho estándar europeo, a CEG considera que “resulta prematuro extraer conclusións definitivas”, mentres non se faga público o contido íntegro do informe remitido a Bruxelas nin se coñezan as implicacións concretas que esta decisión terá para Galicia e para o conxunto do Corredor Atlántico.

A CEG lembra que o Regulamento europeo da Rede Transeuropea de Transporte (TEN-T) obriga aos Estados membros a avaliar que liñas ferroviarias migrarán ao ancho estándar e, posteriormente, a elaborar un Plan de Migración co seu correspondente calendario de actuacións. Con todo, nin ese informe nin esa planificación foron trasladados aos axentes económicos e sociais, a pesar de tratarse de decisións estratéxicas que condicionarán o futuro da competitividade empresarial durante as próximas décadas.

Neste contexto, a Comisión de Infraestruturas considera que o verdadeiro debate non debe centrarse unicamente na conveniencia ou non de transformar toda a rede ferroviaria española, senón en coñecer cal será a planificación para Galicia, que actuacións están previstas no Corredor Atlántico e como se garantirá a interoperabilidad ferroviaria tanto dentro de España como con Portugal e o resto de Europa.

A organización empresarial lembra que vén reclamando desde hai tempo coñecer o contido do Plan Director do Corredor Atlántico, os investimentos previstos, os prazos e a constitución dunha comisión de seguimento que permita manter unha interlocución permanente entre as administracións e as organizacións empresariais.

Do mesmo xeito, considera imprescindible diferenciar a planificación das infraestruturas destinadas ao transporte de mercadorías das de viaxeiros, avaliando especificamente como afectarán as decisións sobre o ancho de vía á competitividade de ambos os tráficos.

A Comisión de Infraestruturas manifesta a súa preocupación polas consecuencias que unha falta de planificación podería ter para Galicia. Por iso, din que “neste momento, corremos o risco de perpetuar non só o illamento cara ao exterior, senón de crear verdadeiras fronteiras ao transporte nacional por ferrocarril”.

Doutra banda, tamén seguen botando en falta claridade e certidumbre sobre como circularán as mercadorías desde o norte e sur de Galicia. “Nós, vimos demandando, reiteradamente, e desde hai moitos anos, a necesidade de que as mercadorías saian polo norte, desde Ferrol, Coruña e Lugo cara a Monforte, para o que é imprescindible a electrificación e desde o sur, desde Vigo e Pontevedra vía Ourense cara a Monforte”.

Así mesmo, a CEG considera que as decisións sobre o ancho de vía non poden adoptarse de maneira illada. Deben coordinarse coa implantación do sistema europeo de xestión do tráfico ferroviario (ERTMS), coa electrificación da rede e co desenvolvemento das infraestruturas ferroviarias en Francia e Portugal, de forma que se garanta unha verdadeira interoperabilidad internacional e se maximice o retorno dos investimentos realizados.

“Necesitamos unha planificación que garanta a posibilidade de transportar mercadorías por ferrocarril ao longo de España, pero tamén que nos permita saír coas mercadorías cara ao exterior. Para iso necesitamos unha infraestrutura que soporte tanto o ancho de vía ibérico como o europeo, que estea electrificada e cuxas medidas de seguridade sexan tamén compatibles”, sosteñen.

Durante a reunión tamén se informou do contido do recente encontro mantido en Bruxelas co coordinador europeo do Corredor Atlántico, François Bausch, e co comisionado do Goberno de España para o devandito corredor. Nesa reunión, a CEG, xunto coas organizacións empresariais do noroeste, reiterou a necesidade de reforzar o Corredor Atlántico como infraestrutura estratéxica para a competitividade empresarial e trasladou a importancia de que Galicia dispoña dunha planificación ferroviaria clara, transparente e aliñada cos obxectivos europeos de interoperabilidad.

A organización empresarial advirte que a falta de planificación ten consecuencias, dando lugar á perda de competitividade dos portos galegos e do conxunto da cadea loxística, o incremento dos custos do transporte, a redución das oportunidades para avanzar cara a unha mobilidade de mercadorías máis sustentable e a dificultade para integrarse plenamente nos grandes corredores europeos afectarían directamente ao crecemento económico e ao emprego.

Como conclusión, a Comisión de Infraestruturas acorda reclamar formalmente ao Ministerio de Transportes a publicación do informe remitido á Comisión Europea, a presentación do futuro Plan de Migración previsto no Regulamento europeo e a creación inmediata do grupo de seguimento do Corredor Atlántico comprometido polo Goberno.

Así mesmo, insiste en reclamar o Plan Director do Corredor Atlántico, que “foi presentado en 2024 pero cuxo texto completo non coñecemos. É moi difícil que os operadores e empresarios aposten polo transporte en ferrocarril, cando non coñecemos a planificación”.